Apple-ın baş icraçı direktoru Tim Kukun (Tim Cook) şirkətə dair diqqətçəkən səhm alımından sonra Nike səhmləri yüksəlişə keçib. Bildirilənlərə görə, Tim Kuk təxminən 3 milyon dollar dəyərində Nike səhmi alıb. Bu addım investorlar tərəfindən Nike-ın gələcəyinə güclü etimad mesajı kimi qiymətləndirilib.

Tim Kuk açıq bazardan hər biri orta hesabla 58,97 dollar olmaqla 50 min Nike səhmi alıb. Bu alışdan sonra onun Nike-dakı ümumi səhm sayı təxminən 105 minə çatıb. Alqı-satqı prosesi ABŞ-ın tənzimləyici qurumlarına edilən rəsmi bildirişlə ictimaiyyətə açıqlanıb. Kukun bu addımı xüsusilə diqqət çəkib, çünki Nike son dövrlərdə bir sıra çətinliklərlə üzləşmişdi. Şirkət son rüblərdə tələbin zəifləməsi, mənfəət marjlarının azalması və xüsusilə Çin bazarındakı yavaşlama səbəbilə təzyiq altında idi. Bu amillər fonunda Nike səhmləri əvvəlki həftələrdə ciddi dəyər itkisi yaşamışdı.

Məhz bu səbəbdən Tim Kukun şəxsi vəsaiti hesabına etdiyi bu alış bazarlarda “şirkətin uzunmüddətli bərpa potensialına inam” kimi dəyərləndirilib. Analitiklər qeyd edirlər ki, yüksək vəzifəli rəhbərin və ya idarə heyəti üzvünün açıq bazardan bu həcmdə səhm alması nadir haldır və güclü siqnal hesab olunur.

Tim Kuk 2005-ci ildən etibarən Nike-ın idarə heyətində təmsil olunur və şirkətdə müstəqil sədr vəzifəsini icra edir. Bu da onu Nike-ın strategiyası, maliyyə vəziyyəti və uzunmüddətli planları barədə daxili məlumata malik əsas şəxslərdən biri kimi göstərir. Xəbərdən sonra Nike səhmləri artım nümayiş etdirib. İnvestorlar Kukun bu addımını, mövcud çətinliklərə baxmayaraq, Nike-ın yenidən güclənə biləcəyinə dair müsbət göstərici kimi qiymətləndiriblər.